ABŞ gizli şəkildə göndərdi, Ukrayna isə bir gecənin içində…
Oktyabrın 17-nə keçən gecə Ukrayna Müdafiə Qüvvələri Rusiyanın işğalı altında olan Luqansk və Berdyanskda iki aerodromuna zərbələr endirmək üçün ATACMS uzaqmənzilli raketlərindən istifadə edib.
Millinews.az xəbər verir ki, bu barədə “The Wall Street Journal” məlumat yayıb.
Qeyd edilib ki, ABŞ son bir neçə gün ərzində gizli şəkildə Ukraynaya az sayda raket göndərib. Ukraynanın aldığı ATACMS modifikasiyasının təqribən 160 km-ə qədər uçuş məsafəsi olduğu dəqiqləşdirilir.
Ukraynanın xüsusi əməliyyat qüvvələri müvəqqəti işğal altında olan Berdyansk və Luqansk aerodromlarının vurulduğunu təsdiqləyib.
Oktyabrın 16-dan 17-nə keçən gecə baş verən raket zərbəsi nəticəsində ruslar xeyli itki veriblər. Son məlumatlara görə, Berdyansk və Luqanskda aşağıdakılar məhv edilib:
- Müxtəlif modifikasiyalı 9 helikopter
- Aerodromlarda yerləşən xüsusi avadanlıqlar
- Hava hücumundan müdafiə qurğusu
- Sursat anbarı
- aerodromların uçuş zolaqları zədələnib
Qeyd edilib ki, Berdyanskdakı sursat anbarında səhər saat 4-ə qədər partlayışlar davam edib. Luqanskda isə partlayışlar səhər saat 11-ə qədər davam edib.
Xüsusi təyinatlıların məlumatına görə, Rusiya ordusu onlarla itki verib, yaralılar var. Bütün gün boyu dağıntılar altından meyitlər çıxarılır.
Xatırladaq ki, Ukrayna aylardır ki, ABŞ-dan rus hərbçilərini arxadan vurmaq üçün uzaqmənzilli silahlar tələb edir, lakin Vaşinqton Rusiyanın eskalasiyası və ABŞ ordusu üçün bu raketlərin çatışmazlığı ilə bağlı narahatlıqlar səbəbindən bundan imtina edib.
Sentyabr ayında ABŞ prezidenti Co bayden Ağ Evdəki görüşdə Volodimir Zelenskiyə Vaşinqtonun Rusiya ilə müharibədə kömək etmək üçün az sayda ATACMS raketlərini köçürəcəyini söyləyib. Bu hələ rəsmi olaraq açıqlanmayıb.
Oktyabrın 17-də V.Zelenski ABŞ-a təşəkkür edib və uzunmüddətli“hücumların özünü sübut etdiyini deyib:
“Ukrayna uğrunda döyüşən və işləyən hər kəsə təşəkkür edirəm! Kömək edən hər kəsə təşəkkürlər! Və bu gün ABŞ-a xüsusi təşəkkür edirəm. Prezident Baydenlə razılaşmalarımız yerinə yetirilir. Onlar çox dəqiq həyata keçirilir – ATACMS-lar özlərini sübut etdilər”.
Hüseyn İbadlı
