“Zal nəzarətçilərinin elektron qeydiyyatı” sistemi bu tarixdə aktiv olacaq

“Zal nəzarətçilərinin elektron qeydiyyatı” sistemi ilə işləyəcək əlaqələndiricilər üçün treninq keçirilib.

Dövlət İmtahan Mərkəzindən Millinews.az-a bildirilib ki, treninqdə Bakı və Sumqayıt şəhərlərinin, Abşeron rayonunun ümumi təhsil müəssisələrinin əlaqələndiriciləri və DİM-in regional bölmə mərkəzlərinin məsul şəxsləri iştirak edib. Treninqlərin regional bölmə mərkəzlərinin məsul şəxsləri tərəfindən həmin mərkəzlərə daxil olan rayonların əlaqələndiriciləri üçün də keçirilməsi nəzərdə tutulur.

Əlaqələndiricilərə cari ildə zal nəzarətçilərinin imtahanlara cəlb edilməsi və imtahanlarda iştirakının təşkili, zal nəzarətçilərinin fəaliyyətinin təhlili ilə bağlı yekun nəticələr və zal nəzarətçiləri bazasının müxtəlif parametrlərə görə tərkibi kimi məlumatlar təqdim edilib, “Nəzarətçilərin elektron qeydiyyatı” sisteminin strukturu, funksiyaları, bazaya daxil edilmiş zal nəzarətçilərinin şəxsi və digər zəruri (təhsil səviyyəsi, ixtisası və təhsillə bağlı digər informasiyalar, sosial sığorta və bank rekvizitləri haqqında məlumatlar və s.) məlumatlarının daxil edilməsi və dəqiqləşdirilməsi, yeni nəzarətçilərin qeydiyyatının aparılması və əmək müqavilələrinin bağlanılması qaydaları barədə ətraflı məlumat verilib.

Bu sistem zal nəzarətçiləri bazasının formalaşdırılması işinin sürətləndirilməsi və prosesin səmərəliliyinin artırılması məqsədilə yaradılıb. Ümumi təhsil müəssisəsi tərəfindən sistemə cavabdeh şəxs qismində təyin olunan əlaqələndirici “Şəxsi kabineti”nin istifadəçi adı və şifri ilə məktəb üzrə zal nəzarətçiləri bazasına daxil olur, mövcud nəzarətçilər bazasında onların zəruri məlumatlarını dəqiqləşdirir, yeni nəzarətçilərin qeydiyyatını aparır və məktəb üzrə ümumi siyahını təsdiq edərək DİM-ə təqdim edir.

Nəzarətçilərin elektron qeydiyyatı sistemində zal nəzarətçilərinə “Şəxsi kabinet”lərinin istifadəçi adı və parolundan istifadə etməklə öz məlumatlarını fərdi qaydada təsdiq etmək imkanı da yaradılıb.

Qeyd edək ki, 2023-cü ildə keçirilən imtahanlara cəlb edilməsi nəzərdə tutulmuş nəzarətçilər bazası təlimlər yekunlaşdıqdan sonra 15232 nəfərdən ibarət olub. Ümumilikdə zal nəzarətçiləri bazasında respublika üzrə bütün rayonları əhatə etməklə 2215 orta təhsil müəssisəsinin, 26-sı AMEA-nın institutları olmaqla 34 təhsil müəssisəsinin və müxtəlif dövlət təşkilatlarının əməkdaşları təmsil olunur. Bunların 2703 nəfəri zal nəzarətçisi sertifikatı almış şəxslərdir (ümumi bazanın 17,8 faizi).

“Zal nəzarətçilərinin elektron qeydiyyatı” sistemi noyabrın 1-dən 24-dək aktiv olacaq.

You must enable Javascript on your browser for the site to work optimally and display sections completely.