Azərbaycanda seysmoloji tədqiqatlarda süni intellektdən istifadə ediləcək

Azərbaycan Milli Elmlər Akademiyası (AMEA) Türkiyənin Daxili İşlər Nazirliyinin tabeliyindəki Təbii Fəlakətlər və Fövqəladə Halların İdarə Edilməsi İdarəsi (AFAD) ilə əməkdaşlığa başlayıb.

“Report” xəbər verir ki, məqsəd seysmoloji tədqiqatlarda süni intellektdən istifadə edilməsidir.

AMEA-nın Rəyasət Heyəti aparatının Elektron Akademiya Şöbəsinin müdiri Fariz İmranov deyib ki, bu məsələ nəinki Azərbaycanda, bütün dünyada gündəmdədir.

Alim, həmçinin, dünyada yaranan yeni terminlərlə bağlı birgə layihələrin həyata keçirilməsinin vacib olduğunu deyib. O, humanitar və ictimai elmlər üzrə aparılan tədqiqatların dünyaya çıxarılması, istinad göstəricilərinin yaxşılaşdırılmasında mühüm rol oynayacaq “Ortaq türk indeksi”nin hazırlanması istiqamətində Türkiyənin artıq ilkin addımlar atdığını bildirib.

Bundan başqa, F.İmranov qeyd edib ki, hazırda AMEA-da “Vikipediya” qruplarının fəaliyyətinin canlandırılması, təlimlərin bərpası üçün zəruri tədbirlər icra olunur. O, həmçinin, AMEA-da Azərbaycan dilinin saflığının qorunması, dilin imkanlarının elmi əsaslarla şərh edilməsi istiqamətində süni intellektdən istifadə etməklə tədqiqat işləri və layihələrin həyata keçirildiyini deyib, Azərbaycan dilinin müasir vəziyyətinə uyğun olaraq təxminən 100 min söz-formadan ibarət əsas korpusun yaradılmasına ehtiyac olduğunu bildirib.