“Sabah” 8 oyunluq qələbə həsrətinə SON QOYDU

Azərbaycan Premyer Liqasında X turun daha bir oyunu keçirilib.

Millinews.az xəbər verir ki, günün ikinci matçı Bakıda baş tutub.

Paytaxt təmsilçisi “Sabah” doğma arenasında “Sumqayıt”ı qəbul edib. Qarşılaşmada hesabı erkən qolla qonaqlar açıblar. İsa Suliman 9-cu dəqiqədə “gənclik şəhəri” təmsilçisini önə keçirib. Lakin Samir Abasovun kollektivinin üstünlüyü bir hissə çəkib.

Meydan sahibləri əvvəlcə 54-cü dəqiqədə bərabərlik topunu vurublar. Con İrasabal adını tabloya yazdırıb. 81-ci dəqiqədə Namik Ələskərov bakılıları hesabda önə keçirib. Qarşılaşmada son nöqtəni isə 90+6-cı dəqiqədə ev sahiblərinin hücumçusu Davit Volkov qoyub.

Beləliklə, rəqibini 3:1 hesabı ilə məğlub edən “Sabah” çempionatda 8 oyunluq qələbə həsrətinə son qoyub. Bu nəticə sayəsində Murad Musayevin yetirmələri xallarının sayını 10-a çatdırıblar. “Sumqayıt” isə 11 xalda qalıb.

Qeyd edək ki, əvvəlki oyunlarda “Turan Tovuz” “Qarabağ”la (2:2), “Kəpəz” “Zirə” ilə (0:0) bərabərə qalıblar, “Neftçi” səfərdə “Səbail”i 4:2 hesabı ilə məğlub edib. Tura oktyabrın 22-də keçiriləcək “Qəbələ” – “Araz-Naxçıvan” matçı ilə yekun vurulacaq.